18/12/2009

Shwmae Shwmae Ffion Williams?


Ffion Williams gymerodd rhan yn ein holiadur 'Shwmae Shwmae' olaf eleni, lle ma pob cwestiwn yn gân Cymraeg. Dyma ei atebion yn llawn.

Shwmae Shwmae?
Fi’n iawn, diolch yn fawr. Shwd y’ch chi?

Blerwytirhwng?
Ar y foment fi rhwng pennod 5 a pennod 6 o Pentalar, drama newydd gan Fiction Factory sy’n dilyn Defi Lewis a teulu Pentalar. Defi Lewis yn cael ei chwarae gan Richard Harrington, o’r 60au hyd at nawr. Drama cyffroes amdano teulu a politics a phethe, a fy nghymeriad i Irfona jyst yn un o ffrindie Defi.


Pam fod eira’n wyn?
Ydyw e rwbeth i neud â’r ffaith bod shwd gymaint o liwiau yn y sbectrwm a ma dwr gyda pob lliw, bo ni jyst yn gweld gwyn achos bod ein penau ni jyst ffili cymryd mewn yr holl sbectrwm?

Ble mae’r bore?
Mae’r bore i fi wastad yn dechre gyda 2 poached egg ar dost brown a tymed bach o fenyn, cwpan o goffi a sigaret, cyn bo fi’n neud dim!

Beth yw’r haf?
Mae’r haf gorfod bod ar lan y môr rhwle. Haf dwetha aethon ni i Gernyw - fi a’n sboner - yn bac campervan, a gaethon ni amser gwych! Mae Cernyw yn le lyfli.

Pa loches?
Lloches yw tŷ mam a dad nôl ar ddydd Sul i gael cinio dydd Sul. Yorkshire puddings a beef gyda pen tost fel arfer o’r noson cynt!

Pwy wnaeth y sêr uwch ben?
Nes i ennill Steddfod Gylch yn yr Ysgol Gynradd yn canu ‘Pwy Wnaeth y Sêr Uwchben?’ a cytgan ffefryn fi oedd ‘ Pwy Wnaeth yr Eliffant?’. ‘Na beth o’n i’n hoffi!

Pwy sy’n dwad dros y bryn?
Wel Sion Corn nath ddwad dros y bryn yn ddistaw ddistaw bach gyda loads o anrhegion lyfli i fi blwyddyn hyn so diolch yn fawr i ti Sion Corn am y coffi maker hyfryd gyda cappuccino steam frother ar yr ochr!

Ydio’n wir?
Ydy e’n wir bod ceffylau’r môr, as in seahorses, ddim yn tyfu i maint ceffyl? Achos tan cwpwl o fisoedd yn ôl o’n i actually meddwl bo nhw’n tyfu i maint ceffyl ac un o’n uchelgeision fi fel person oedd i reido seahorse. Ac yn ôl pob sôn, fi ddim yn cael neud e!

Pwy sydd isho bod yn fawr?
Ma problem mawr ‘da fi. I fod yn fawr o ran taldra, licen i fod cwpwl o fodfeddi yn llai achos bo fi’n 5’11”, a hefyd hoffen i fod yn fwy tenau. Rwy wedi joino Slimmers World ond odd hi’n anodd iawn dros Dolig cadw ato fe so fi ‘di bod yn osgoi mynd ar y scales!

Pwy sy’n galw?
Ma ffôn-ffobia ofnadwy ‘da fi. Os ma rhywun yn galw a nagyw’r enw yn dod lan, fi byth yn ateb a fi’n rili sori ma rhaid i chi adael neges i fi wybod pwy sy’n galw. Na’i alw chi nôl straightaway!

Fuoch chi erioed yn morio?
Aethon ni i morio, pysgota, am frithyll pryd o’n i yn Solfa ddwetha. Experience hyfryd. Gaethon ni lot, lot o frithyll a fi’n dwli ar byta pysgod!
Darllen mwy...

Shwmae Shwmae Russell Jones?


Fe gymerodd Russell Jones rhan yn ein holiadur 'Shwmae Shwmae', lle mae pob cwestiwn yn gân Cymraeg. Dyma ei atebion yn llawn.

Shwmae Shwmae?
O, iawn sdi! Champion!

Blerwytirhwng?
Dwi rhwng Penygroes a Caernarfon. Yn Rhosgadfan dwi’n byw, pentra bach i fyny ar ben mynydd yn fama.

Pwy sy’n dwad dros y bryn?
Wel mae jyst yn dolig, a wedyn gobeithio ‘na Sion Corn fydd o ‘de!

Ydy o werth o?
O yndi, mae o werth o ‘de. Ma raid i chdi goelio yn be wyt ti’n gredu a jyst mynd ymlaen efo’r peth de.

Pwy fedar olchu?
Ma nghariad yn un da yn golchu, ma hi’n cael staens allan o bob math.

Pwy all brynu dy feddyliau?
Wel ar hyn o bryd Byw yn yr Ardd sy’n prynu’r meddyliau ond dwi’n agorad i ryw fudiad Merched y Wawr neu Ffermwyr Ifanc neu be bynnag, ti’n gwbod, mwydro nhw am y ieir a pethe de!

I ba beth mae’r byd yn dod?
Wel dwi’m yn gwbod. Ma hwnna’n gwestiwn mwy nag y gella i ateb de, ond dwi’n trio helpu’r byd fel ma’n mynd yn ei flaen.

Pwy wnaeth y sêr uwchben?
Dwi’m yn gwbod. Dwi’n meddwl bod y sêr yma’n barod ‘llu.

Pwy sy’n galw?
S’nam llawer yn galw ar hyn o bryd. Da ni’n byw yn lle mor uchal a da ni mor brysur sa neb yn galw acw ‘di mynd de.

Oes rhaid i’r wers barhau?
Ma’n bwysig bod y wers yn parhau. Ma rhaid i mi ddeud ‘tha bobol y ffordd i blannu a’r ffordd i drin y tir, a’r ffordd i beidio gwastraffu. Mae’n bwysig.

Pam fod adar yn symud i fyw?
Wel ma’n dda bod adar yn symud i fyw. Am bo dwi’n magu gymaint o ieir, ma’n dda bo nhw’n cael hyd i cartrefi newydd i fi gael magu mwy ohonyn nhw de!
Darllen mwy...

Shwmae Shwmae Bethan Gwanas?


Fe wnaeth Bethan Gwanas gymryd rhan yn ein holiadur 'Shwmae Shwmae', lle ma pob cwestiwn yn gân Cymraeg, a dyma ei atebion yn llawn.

Shwmae Shwmae?
Ofnadwy o stiff heddiw achos fues i’n merlota ddoe a nes i ddisgyn ar fy mhen ôl.

Blerwytirhwng?
Rhwng 84 ac 86 o’n i yn y bush yn Nigeria achos o’n i newydd adael coleg ac o’n i wedi mynd i fyw yna am ddwy flynedd. A dyna’r peth gore nes i erioed, a dach chi’n gwbod be, dwi’n mynd nol yna yn yr Hydref i weld os ydy’r hen blant ysgol yn dal i nghofio fi. Mi fyddan nhw yn eu 30au wan! Oho!

Beth yw’r haf?
Fel arfer dwi wrth fy modd efo’r haf. Dwi’n mynd i lan y môr, dwi’n dringo mynyddoedd, dwi’n cysgu yn yr hamoc yn yr haul yn y ngardd i, ond eleni mae ‘di bod yn uffernol dydy felly di’r hamoc ddim ‘di bod allan a dwi ddim ‘di bod fyny run mynydd eto! Ella bod hi well yn yr eira beth bynnag.

Ydio’n wir?
Wrth gwrs bod o ddim yn wir. Ma genna’i ddychymyg chi! Di bob dim dwi’n sgwennu ddim yn wir nachdi. Felly stopiwch feddwl hynny, reit!

Pwy all brynu dy feddyliau?
Unhryw un sy’n darllen y Daily Post ar ddydd Mercher achos dwi’n sgwennu bob dim dwi’n deilmo mewn yn hynna bron iawn, ac wrth gwrs unrhyw un sy’n prynu fy llyfrau i achos ma sens yn deud ma’n meddyliau fi ynddyn nhw yndi!

Pwy wnaeth y sêr uwchben?
Reit dwi’m yn siwr am hwn achos, esh i i ysgol Sul ond nesh i erioed gredu yn Duw ychi. Dwi’n meddwl na uffarn o bang mawr nath y sêr. Sori Nain!

I ba beth mae’r byd yn dod?
I ben, ma arna’i ofn, yn ara bach. Os na newidiwn ni ein ffyrdd.

Wyt ti’n cofio?
Bod yng nghyngerdd ola Edward H yn, dwi’m yn cofio pryd oedd o ond dwi’n cofio fo achos o’n i’n uffernol o ifanc, dan oed, ddim ffit i fod allan ac adeg hynny odd pawb yng ngtymru ifanc yng nghymru yn addoli un grwp, sef Edward H. Ac o’n i yna, yng Nhorwen! O’n na gymaint o bobl yna odd yn nhraed i ddim yn cyffwrdd y llawr ac oedd na gymaint o chwys odd o’n disgyn ar eich pen chi fatha glaw o’r nenfwd. O’n i yna!

Pwy sy’n galw?
Dyddie yma, yn gyson, wel, y postmon!

Oes yna le i mi?
Oes yna le i mi yn dy fywyd di? Na, ti rhy hwyr yn fflipin gofyn. Lle ti di bod eh? Iasu, ma isho mynadd.

Fuest ti erioed yn morio?
Do, fuesh i’n balast ar long hwylio yn harbwr Lagos ac os ydach chi wedi bod yn Lagos erioed dach chi’m isio cael eich pen yn y dwr achos ma’n llawn o gyrff pethau wedi marw. A hefyd dwi’n gallu hwylio, diolch i Yr Urdd a Glan Llyn!

Pam V?
Achos dwi’n i haeddu o!
Darllen mwy...

01/12/2009

Shwmae Shwmae Ceri Cunnington?


Ceri Cunnington gymerodd rhan yn ein holiadur 'Shwmae Shwmae' wythnos dwetha ar Gofod - lle ma pob cwestiwn yn gân Cymraeg. Dyma ei atebion yn llawn.

Shwmae Shwmae?
Yn reddfol dwi isho deud Iawn, ie ie, ond, yh - Iawn. Ie, ie!

Bing Bong be?
Ydy'r gân gynta dwi'n cofio wrth cael peint legal yn y Tap yn Blaenau Ffestiniog. Mae wastad yn dod allan ar ôl rhyw un fach.

Blerwytirhwng?
Rhwng penderfynu os ydy bywyd cerddorol neu bywyd gwaith 9 tan 5 yn siwtio fi ora.


O le ga'i eda?
Ydy'r gân waetha dwi erioed wedi clywad yn fy mywyd. Sori Gai!

Cenfigennus o be?
Capacity Rhys Mwyn i anghofio be oedd y 90’au fel go iawn yn y sîn roc Gymraeg. Y clown!

USA, oes angen mwy?
Oes. Mae hi ychydig bach yn hyberbole yna ar y funud efo bob dim sy'n digwydd a dwi'n meddwl bo rhaid i ni sbio ar ein hunan cyn sbio at America am ryw fath o arweinyddiaeth. Er, ma be sy'n digwydd yna'n grêt.

Ble mae'r bore?
Y bore ydy deffro efo Cadi am chwarter wedi pump. Cadi ydy'r ferch, a y bore ydy'r ore. Mae bob bore fatha bore Dolig! Ffwc - cheesy!

Pwy sy'n dwad dros y bryn?
Llwyth o sgowsars yn eu Ford Capris gwyn yn llawn danteithion peryg i bobol Blaenau.

Pam wyt ti'n wylo wylo?
Yn hawdd, yn rhy hawdd. Pan dwi'n gwylio, gwylio teledu.

Yyh?
Yn union. Dwi'n meddwl taw honna ydy'r teitl cân gora’ erioed.

Lle ti di bod?
Dwi 'di bod mewn sefyllfaoedd eitha diddorol, anghyfforddus, cyfforddus, anhygoel, bendigedig. Dwi 'di bod yna er mwyn cael dod yn ôl.
Ers i Anweledig chwalu dwi di bod yn neud yr un peth a cyn i Anweledig chwalu. Gweithio yn y swydd 9 tan 5 'na o'n i'n trio penderfynu os o'n i isho gweithio ynddi. Ond os ydy bosys fi'n gweld bo fi'n cwestiynu os dwi'n gweithio yn y swydd 9 tan 5 yna, dwi'n probably colli'r job 9-5 yna. Sori - dwi isho gweithio yn y job 9 tan 5 yna!

Ges di dy buro yn fflamau'r tân yma?
Dwi'n gobeithio gesh i'm mhuro yn fflamau'r tân dwetha ond na'i fyth deud, “Never Say Never” fel dywed y Sais.
Darllen mwy...

30/11/2009

Beth ddysgon ni wythnos dwethaf ar Gofod

Ma ffilm newydd Gruff Rhys, Seperado!, yn wych – ac roedd Geth yn flin am nad oedd yn cael mynd mewn i’w weld.

Ma Michael y Tacsi yn hapus i helpu Malcolm Allen allan gyda’i ffurflen dreuliau...

Llysenw Geth oedd FA Cup yn yr ysgol am fod ganddo glustiau mor fawr. Ma gyda rhai o enwogion Cymru lysenwau da – John Bwts yw John Pierce Jones a Honey Monster yw Ifan o Derwyddon, gyda’i wallt melyn a’i wallgofrwydd meddwol. Ond mae gan y cyhoedd lysenwau gwell fyth, Hari Tampon, er engraifft. Ydych chi’n cofio pam ma nhw’n galw fe’n Hari Tampon?

Ma Owen Powell yn genfigennus o gerddorion sy’n gallu canu mwy nag un offeryn.

Ma Geth yn hoff o fwyd poeth, allith e ddim fyw heb gyri, ond ma Elen yn hoff o fwyd mwy melus – fferins ydy’r peth y galle hi fyth byw hebddo. Darllen mwy...

25/11/2009

Shwmae Shwmae Owen Powell?


Owen Powell gymerodd rhan yn ein holiadur 'Shwmae Shwmae' wythnos yma ar Gofod - lle ma pob cwestiwn yn gân Cymraeg. Dyma ei atebion yn llawn.

Shwmae Shwmae?
Iawn, ie ie.

Blerwytirhwng?
Wel rhyw hanner ffordd - mewn gwirionedd union hanner ffordd - rhwng Gorllewin Cymru a Llundain. Mae 'na bentref bach o'r enw Caerdydd, ac yna dwi ar hyn o bryd. Bydden i’n hoffi bod yng Ngorllewin Cymru yn neud llai o waith. Falle dylwn ni fod yn Llundain yn neud fwy o waith! Ond yma dwi'n hapus, so Caerdydd sydd pia hi.

Cenfigennus o be?
Dwi wastad wedi bod yn genfigennus o gerddorion sydd yn gallu chwarae pob offeryn felly ma nhw'n neud albyms, a dim ond nhw sy'n chwarae arnyn nhw. Elliot Smith - cerddor Americanaidd; Shuggie Otis - cerddor ffync o'r 70au. Chwarae pob offeryn! Todd Rundgren yn un arall. Prince! Stevie Wonder! Ychydig iawn o bobl gwledydd Prydain a Cymru sydd yn neud y math yma o beth, ma'n rhywbeth sy'n perthyn i Americanwyr. Felly dwi'n genfigennus o gerddorion Americanwyr yn gyffredinol!

Faswn i, fysa ti?
Ma rhywbeth reit cheeky am y cwestiwn yna! O'n i wastad wedi cymryd bo bechgyn Brigyn ddim cweit mor cheeky a hynna. O'n i ddim yn disgwyl i Ynyr a Eurig fod mor “hei, fyswn i! Fysa ti?”. Alla i ddychmygu'r ddau ohonyn nhw yn y stiwdio neu mewn tacsi neu ar y bws yn gweld merch yn cerdded heibio ac yn dweud, “Faswn i! Fysa ti?”. Falle nid dyna ystyr y gân o gwbwl, ond faswn i. Probably.

Pam fod adar yn symud i fyw?
Dyw e ddim yn wyddonol gywir achos dyw nhw ddim yn symud i fyw, ma nhw'n symud dros y gaeaf i le gwell. Ac o ystyried y tywydd ni'n cael yn y wlad yma dwi'n meddwl bod e'n syniad eitha doeth. Felly ma nhw'n symud i rywle poeth - rhywle neisach - fel Sbaen neu Gogledd Affrica, a dy'n nhw ddim yn symud yna i fyw achos ma nhw'n dod nol wedyn i nythu. Felly dyna'r gwirionedd, ramadegol gywir, ffeithiol, wyddonol. Amen!

Be fedra i gynnig?
Sdim lot fawr 'da fi i gynnig rili. Yr unig beth alla i gynnig ydy lifft yn fy Land Rover i. Ma 'da fi hen Land Rover sydd 'di kitio allan fel campervan a ma 'da fe'r roof-rack mawr yma arni. Felly arwahan i’r ychydig sgiliau sydd gyda fi mewn bywyd, byddwn i yn gallu cynnig lifft i chi os chi'n digwydd hoffi mynd mewn Land Rovers sydd yn llawn dwr a sydd ddim yn dwym iawn. So alla'i gynnig hynna!

Ble mae'r bore?
Odd teitl y gân yma, neu'r cwestiwn yma, wastad yn atgoffa fi o partïon yr 80au hwyr a'r 90au cynnar, ble oedd pobl yn mynnu partïo reit trwy'r nos. A dwi'n siwr bo pobl ifanc yn dal i neud. Ond weithie, tua 4, 5 o'r gloch pan ma pobl dal i fyny'n siarad ac yn chwarae cerddoriaeth trwy'r PA systems ti'n meddwl, “ble exactly mae'r bore?” A chi'n dechre ysu am fynd i'r gwely a sylweddoli bo chi 'di troi yr holl ddiwrnod a'r holl noson yn beniwaered achos chi dal yn effro pryd ma'r haul yn dod i fyny pryd dylech chi fod yn y gwely ac yn codi, a chi'n mynd nol i'r gwely wedyn pryd ma'r haul wedi dod reit i fyny. Dwi ddim yn siwr os yw hyn yn neud unrhyw sens, ond yr holl deimlad yna o ble mae'r bore, dyw e ddim i fod i neud sens rili nagyw e?

Iawn del?
Yma yng Nghaerdydd dy' ni ddim yn gweud “Iawn del?” - yn amlwg mae'n rhywbeth o'r gogledd. Yng Nghaerdydd yn arbennig da ni'n dweud “Alright love?”. A'r dyddie yma ma “Alright love?” neu “Iawn del?” yn rhywbeth sydd jyst yn gyfarch hamddenol, rhywbeth neis chi'n ddweud wrth rhywun. “Alright love?”. Ma'r math yna o beth 'di mynd yn amhoblogaidd achos bod e i fod yn sexist, ond yma yng Nghaerdydd, ma pobl jyst yn gweud “Alright love?” - chi'n dweud e ar y bys i bobol, i bobol chi ddim yn nabod, a dwi'n siwr bod yr un peth yn wir yn gweud “Iawn del?” i bobol. Ydy e'n dderbyniol? Sa i'n gwbod. Dwi dal i ddweud e! Alright love?!

Pwy sydd eisiau bod yn fawr?
Wel, dwi'n eitha tal. Dwi'n rhyw 6 troedfedd 4 modfedd, a alla i sicrhau chi bo fi ddim mo’yn bod yn fawr. Y rheswm ydy ma'n neud prynu trowsus yn anodd iawn - ma cael jins bron yn amhosib! Pan o'n i'n ifanc, os chi'n dal ac yn fawr chi yw'r person cyntaf sy'n cael trafferth mewn unrhyw pyb. Chi'n cerdded mewn i pyb gyda grwp o ffrindiau sydd i gyd yn normal, a wedyn os oes yna unrhyw fath o drafferth o gwbwl, ma pawb yn pigo ar y person sy'n dal! A fi oedd e, so dwi ddim isie bod yn dal ddim mwy diolch yn fawr iawn. Dwi ddim isie bod yn fawr chwaith.

Pwy sy'n rheoli'r donfedd?
Be sy'n ddiddorol am dechnoleg a'r byd sydd ohoni ar hyn o bryd, yw mae'n bosib mewn cwpwl o flynyddoedd fydd na ddim shwt beth â tonfedd. Ar hyn o bryd bydden i'n gweud taw Radio Cymru a Radio 1 sy'n rheoli'r donfedd, ond gyda symudiadau pobl yn gwrando onlinea satellite radio, a fydd shwd beth â tonfedd? Y peth yw bo pobl yn gallu dewis nawr. Dy’ nhw ddim yn gorfod gwrando ar Chris Moyles yn siarad yn y bore - ma nhw jyst yn gallu mynd ar Spotify a gwrando ar gerddoriaeth heb cael lleisau drwyddi draw. Mae'n dibynnu ar be chi moen ond ar hyn o bryd Radio Cymru a Radio 1 sy bia'r donfedd, ond bydden i'n meddwl mewn rhyw ddeg mlynedd bydd tonfeddi ddim yn bodoli dim mwy.

Fuoch chi erioed yn morio?
Do. Fe fues i'n morio ym Mae Ceredigion unwaith gyda mhlant, a o'n i 'di rhyfeddu ar gymaint o wahanieth sydd rhwng y tywydd ar dir carregog saff ac ar y môr. Hynny yw, chi'n gadael Dinbych y Pysgod a mae'n boeth a chi'n gwisgo crys-t a ma pawb yn hapus. Rhyw ddwyawr wedyn yn y glaw allan yng nghanol y môr, dodd pawb ddim cweit mor hapus. Odd gen i gynlluniau i fynd i morio eto eleni. A fod yn onest dydy mynd ar rhyw cruise bach o ddwyawr ddim rili yn morio. Dyw e ddim fel bo ti'n ymuno â'r Royal Navy neu'r Merchant Navy so dyw e ddim yn rili morio. Ond dyna'r agosa dwi di dod at forio, felly do, fe fues i yn morio!

Darllen mwy...

23/11/2009

Beth ddysgon ni wythnos dwethaf ar Gofod

Ma dawnsio 'burlesque' yn boblogaidd yng Nghaerdydd, ond ma 'na fwy o ferched na dynion yn y gynulleidfa, ac mae'n syndod mor ddel yw Gethin Evans mewn 'nipple tassels'... Ma Geth Thomas o Gwibdaith yn edrych yn debyg i Gordon Brown.

Fe gollodd Dewi Prysor ei ddannedd blaen yn Bratislava.

Ma Osian a Rhys o Yr Ods yn deall ceffylau a rasio. Teg yw dweud fod Griff a Gruff o yr Ods ddim yn deall ceffylau a rasio.

Pan oedd Al Lewis yn arddegwr, roedd ganddo bosteri Buffy The Vampire Slayer ar wal ei stafell wely. Liam Gallagher oedd yn addurno wal Dyl Mei, Jimi Hendrix oedd ar wal Gareth Bonello tra bod gan Jonsi a Rhys Mwyn bosteri George Best.

Ma Daf Nant o Sibrydion a BOB yn meddwl ei fod yn edrych fel Hugh Grant

Y Mws Piws yw hoff gwrw Cymreig ffermwyr ifanc Ysbyty Ifan

Ma Ian Gwyn Hughes yn poeni am faint o helynt ma loris yn creu wrth basio ei gilydd ar yr M1 am 5 o'r gloch ar brynhawn dydd Gwener.

Pan oedd Gareth Bonello yn fach, roedd e ishe bod yn ffotograffydd bywyd gwyllt pan oedd wedi tyfu lan. Astronaut oedd Dewi Prysor am fod. Roedd Owen Powell yn dipyn llai uchelgeisiol, gan obeithio fod yn gwagio bins Caerdydd. Roedd Dyl Mei am fod yn lofrudd a Tudur Owen ishe bod yn ddrymiwr.
Darllen mwy...

17/11/2009

Shwmae Shwmae Dyfrig Evans?


Dyfrig Evans gymerodd rhan yn ein holiadur 'Shwmae Shwmae' wythnos yma ar Gofod - lle ma pob cwestiwn yn gân Cymraeg. Dyma ei atebion yn llawn.

Shwmae Shwmae?
Ddim yn ddrwg o gwbwl. Mae’n ddiwrnod braf ar ddiwedd haf a ma petha reit dda.

Blerwytirhwng?
Dwi newydd orffen ffilmio drama newydd wedi ei leoli yn Llandudno o’r enw ‘Blodau’, a dwi rhwng gorffan hwnna a di-weithdra! A dwi’n edrych mlaen i weld o ar y teledu yn amlwg.

Pwdi hwn?
Haha! Pwy ‘di hwn? Pwy ‘di pwy? Pwy ‘di be? Pwy ‘di honna? Ia. Pwy ‘di hwn?

Fyswn, fasat ti?
Hen fwstard y Sais?! Faswn i byth yn llowcio hwnna i gyd heb stecan, rhag ofn iddo fo losgi’n nhafod i.

Tybed lle ma hi heno?
Lle ma hi heno? Wel adra siwr yn disgwyl amdana i fatha bob tro arall, ond mi a’i adra heno. Ia, sa’n well i mi dwi’n meddwl.

Pwy sy’n rheoli’r donfedd?
Eto, hi sy’n rheoli, efo llawn rheswm i fod yn trio rheoli. Ma’n anodd rheoli rhwbath sydd ddim efo rheolaeth arno fo dwi’n meddwl. Dwi’m yn gwisgo sgert ond ma hi yn bendant yn gwisgo trowsus.

Lle ti di bod?
Dwi ‘di bod ar y ffair tu allan i’r castell ar y maes yng Nghaernarfon ar y peth seti na efo cheinia arna fo, a dwi’n teimlo’n reit chwil a deud y gwir.

I ble nawr?
Dwi’n gobeithio mynd i Alton Towers efo’r plant cyn diwedd gwyliau’r haf am fwy o reids sy’n neud i fi deimlo’n chwil. Stopio fi yfed gymaint.

Pwy ti’n mynd ‘da nawr?
Yr un un ddynas dwi bod yn mynd efo ers tua chwe mlynadd a hanner. Fy ngwraig annwyl.

Beth yw’r haf?
Yr haf i fi ydy diwrnoda lle di’r cloc ddim yn tician. Dim amser penodol mynd i’r gwely, a dim amser penodol i ddeffro. Ac yng Nghymru - yn anffodus - glaw a haul yn dod yn un.

Ydy o’n wir?
Ydy mae o’n wir, dwi yn dechra gwynnu. Dwi ddim yn rhoi lliw yn fy ngwallt achos ma gen i flew jinj ar fy ngwynab so ‘sa fo’n clasho. So dwi am adael iddo fo wynnu dwi’n meddwl a mynd yn hen efo dignity dal intact.

Wyt ti’n cofio?
Dwi’n cofio petha da a drwg ond hyd yn hyn ma’r petha da yn goroesi’r drwg.

Pwy sy’n dwad dros y bryn?
Dim ond un person sy’n dwad dros y bryn. Mae’n byw yn agos iawn i Nebo a bellach mae ei farf o’n wyn ac yn hir, a ma’n gwagu sach unwaith y flwyddyn bellach. Sef Bryn Fôn!

Darllen mwy...

13/11/2009

Beth ddysgon ni ar Gofod wythnos yma

Mae'n bwysig rhoi'r handbrake ymlaen ar ol parcio, hyd yn oed os jest yn picio i'r ty bach. Gofynwch i Alun Williams.

Ma Iwan o Cowbois Rhos Botwnnog yn edrych fel Bob Dylan.

Yn ol mam Elin Fflur, mi oedd yn bosib sgwrsio gyda'r gantores 'fel hen fenyw' pan oedd hi ond yn ferch bach...

Roedd Dyl Mei yn crio pan oedd ei rhieni yn rhoi recordiau Bob Dylan ymlaen pan oedd yn grwt. Ac odd gyda fe 'cow's lick' cwl!

Arwyr yr Ed Holden ifanc oedd Jim Reeves, Frank Sinatra a Diana Ross.

Mae Glyn Wise yn gallu bod yn ddyn llawer mwy grac nac y bydde chi'n disgwyl - yn enwedig am wleidyddiaeth!

Ma Huw Chiswell yn ffan o'r Swans, Gary Slaymaker ac Owen Powell yn dilyn Dinas Caerdydd, hanner Cymru yn cefnogi Lerpwl ac Elin Fflur, jest i fod yn wahanol, yn ffan Everton.

Y lle gorau ma Bethan Gwanas erioed wedi bod yw Antarctica.

Ma Mari Grug rhwng Elin a Lisa.

Ma Dan o Sibrydion yn edrych fel Johnny Rotten.

Pan oedd Ian Cottrell yn fach, roedd yn hoff o ddylunio dryllau newydd i gymeriadau Star Wars, ond pan oedd hyn a'n fwy soffistigedig, roedd yn well ganddo ddarllen Smash Hits.

Ma na bobol allan yna sy'n casglu unrhywbeth, gan gynnwys papur wrapio siocledi.
Darllen mwy...

Cwis Tafarn Gofod

Ma pawb yn licio cwis tafarn! Naethon ni setio lan cwis tafarn bach ar Gofod neithiwr rhwng criw o gogs a criw o hwntws. Allwn ni ddim ail-greu awyrgylch a chwrw yr Hen Llew Du yn Aberystwyth ar y blog, ond i'r sawl ohonnoch sydd a diddordeb rhoi weithgaredd i'r mater llwyd, dyma cwestiynau y cwis. Na i rhoi'r atebion lan ar Ddydd Llun!

Papur a phensil yn barod?

1. Beth oedd enw gwreiddiol Mickey Mouse?
2. Pa anifail sy'n cynhyrchu'r epil mwya?
3. Pwy oedd cyd actor/es Leornado di Caprio yn Titanic?
4. Pa fath o greadur yw'r 'bustard'?
5. Pwy sydd yn dal y record fel y gyrrwr Prydeinig ifancaf Formula 1?
6. Chwaraeodd Will Smith rhan Steven Hiller yn y ffilm 'Independence Day'. Beth oedd ei enw cod?
7. Mae yna ddau orsaf trens yn Llundain sydd a'r gair 'Cross' yn yr enw. Enwch y ddau.
8. Yn stori Hans Christian Andersen, beth oedd enw'r ferch a'i darganfuwyd mewn blodyn?
9. Pa dalaith yn America sy'n dechre a'r llythyren 'P'?
10. Yn 1996 pa frand gurodd Coca-cola i fel brand enwoca'r byd?
11. Pa wirod yw sylfaen y Black Russian?
12. Beth yw prifddinas Venezuela?
13. Ym mha ffilm naeth Jim Carrey chwarae rhan clerc banc o'r enw Stanley Ipkiss?
14. Pwy wlad yw cartref cwrw Grolsch?
15. Enwch y tri ffilm James Bond sydd a teitle un gair.
16. Enw pwy offeryn sy'n dod o'r geiriau Eidalaidd am meddal ag uchel?
17. Am beth yw'r llythyren 'V' yn DVD yn sefyll?
18. Ym mha flwyddyn y cafodd yr ebost cyntaf ei anfon?
19. Pwy beintiodd Y Swper Olaf (The Last Supper)?
20. Pa wlad yn Ne America sydd a'r enw Inca, sy'n golygu 'Gaeaf Oer'?
21. Pwy sy'n chwarae rhan Jinx ar Pobol Y Cwm?
22. Pwy sy'n cyflwyno 4Wal ar S4C?
23. Ymhle cynhaliwyd Sessiwn Fawr Dolgellau 2009?
24. Gorffenwch deitl can Geraint Lovgreen 'Nid Llwynog oedd yr...'
25 Ym mhw flwyddyn y sefydlwyd Prifysgol Aberystwyth?

Atebion ar Ddydd Llun! Darllen mwy...

10/11/2009

Shwmae Shwmae Mari Grug?


Mari Grug gymerodd rhan yn ein holiadur 'Shwmae Shwmae' wythnos yma ar Gofod - lle ma pob cwestiwn yn gân Cymraeg. Dyma ei atebion yn llawn.

Shwmae Shwmae?
Shwmae! Fi'n dda iawn diolch. Ma'r haul mas felly fi'n hapus.

Blerwytirhwng?
Wel, fi yw'r ganolig. Ma da fi chwaer hyn o'r enw Elin a chwaer ifancach o'r enw Lisa. Dwi'n eitha joio fod yn y canol ma rhaid i fi weud. Dwi byth ar ben fy hunan! Felly ie, dwi rhwng Elin a Lisa.

Pam fod eira'n wyn?
Wel, ma eira yn wyn achos bod eira yn adlewyrchu pelydrau o olau. Fi'n gyflwynydd tywydd felly yn anffodus pan ma'r tywydd yn ddiflas fel ma'i di bod dros yr haf eleni, pobl fel fi sy'n cael y bai. Ond pan ma'r haul mas a ma pawb yn joio, wel dwi'n boblogaidd tu hwnt! Ond fi'n eitha joio eira ma rhai di fi 'weud - mae'n oer, cwtsho lan yn y ty. Ond pan mae'r haul mas - dyna pan ma pawb yn hapus.

Beth yw'r haf?
Yr haf, yn syml, yw pan mae'r haul mas. Pan ma'r tywydd yn braf, pan ma'r haul yn gwenu a ni'n cael tywydd braf ar gyfer y Sioe Frenhinol, y Steddfod, a cyfle hefyd i fynd i'r traeth i dorheulo, ymlacio, bach o syrffio falle, bach o nofio yn y dwr. Felly haf, ie - bach o haul, ‘na gyd fi'n gofyn am!

Cenfigennus o be?
O bobl sy'n gallu darllen gwybodaeth a'i gofio fe'n syth. Rhyw fath o ffotograffic memory. Dyw e ddim 'da fi a sen i'n lico se fe gyda fi ma'n rhaid i fi weud. Pobl sy'n darllen gwybodaeth a ma nhw'n cofio fe'n syth a gallu ailgylchu fe a cofio fe am flynyddoedd.

Wyt ti'n gêm?
Ydw! Na'i drio unrhywbeth unwaith ma'n rhaid i fi weud. Fi wedi bod yn Glastonbury yn ganol y mwd, wedi gwersylla am 5 diwrnod heb gawod - ych! Dwi wedi neidio mas o awyren 15,000 o droedfeddi fyny i neud skydive. Yn fy ngwaith bob dydd, nes ddechre yn cyflwyno Planed Plant, wedi neud cwpwl o bethe amrywiol a nawr fi'n cyflwyno'r tywydd. Felly ydw, dwi'n gêm i unrhywbeth sen i'n gweud.

Lle ti di bod?
Bore ma dwi di bod yn y siop trin gwallt. Ma da fi briodas fory yn Caerwrangon - neu Worcester i chi a fi, felly fi'n gobeithio fydd y pâr sy'n priodu yn lico fy ngwallt newydd i.

Pwy wyt ti yn mynd da nawr?
Wel, dwi'n mynd mas gyda Gareth James a ni newydd ddyweddïo ers tua pythefnos felly dyma'r fodrwy - mae'n neis. Mae'n sparklo - ar hyn o bryd ta beth. Fe nathon ni gwrdd yn Ysgol y Preseli, felly ni'n dipyn o childhood sweethearts, a ni wedi bod gyda'n gilydd am bron i 8 neu 9 mlynedd felly tipyn o amser.

Tybed lle mae hi heno?
Wel heno dwi'n mynd i Gapel Salem yn Canton ar gyfer ymarfer Côrdydd. Fi'n canu gyda Côrdydd ers dros blwyddyn a hanner.

Ydy o'n wir?
Ydy, mae e'n wir. Dwi'n 24 mlwydd oed, a dwi'n dal i sugno fy mys!
Darllen mwy...

09/11/2009

Shwmae Shwmae Alex Jones?


Alex Jones gymerodd rhan yn ein holiadur 'Shwmae Shwmae' wythnos yma ar Gofod - lle ma pob cwestiwn yn gân Cymraeg. Dyma ei atebion yn llawn.

Shwmae Shwmae?
Iawn, ie ie!

Blerwytirhwng?
Ar hyn o bryd rwy rhwng brecwast a cinio. Neu dou gar, achos yn llythrennol ar ôl bod fan hyn fi'n mynd syth i'r garej i rhoi fy nghar i nol - bydd e'n ddiwrnod trist iawn i’r car bach melyn - ac i bigo car newydd lan. Felly dwi rhwng dau gar - yn llythrennol!


Cenfigennus o be?
Mewn bywyd yn gyffredinol dwi'n genfigennus iawn o bobl sydd ddim yn poeni, achos dwi'n boenwraig - os yw hwnna'n air - o fri. Wastad yn poeni am rwbeth. Ond ar hyn o bryd, fi'n starfo gormod i boeni.

Pam fod adar yn symud i fyw?
Wel pam lai? Achos sen i'n aderyn ar hyn o bryd sen i'n cael ty parhaol yn Sbaen a ddim yn trafferthu i ddod nol fan hyn o gwbwl, achos bydde dy blu di wastad yn wlyb a dyw adar ddim yn defnyddio sychwyr gwallt! Felly dyna pam bo adar yn symud i fyw. Ife na'r cwestiwn? Ie, sen i'n aderyn, sen i'n aros mewn rhywle twym!

Be fedra i gynnig?
Alla i gynnig coffi os ych chi'n dod i'r ty. O ran talentau, alla'i neud dynwarediad o dolffin. Ond dwi ddim yn gwbod beth yw dolffin yn y Gymraeg!

Beth yw'r haf?
Ma'r haf yn rywbeth dy'n ni heb weld ers tua 1987 bydden i'n gweud. Mi oedd e'n boeth ac yn dwym lle oedd pobl yn bwyta hufen iâ ac yn gorwedd ar y traeth. Erbyn hyn ma'r haf yn meddwl bwyta chips yn y car ar ddwrnod glyb.
Ie, itha diflas a gweud y gwir. Dyw ‘haf’ ddim yn bodoli.

Pwy sy'n dwad dros y bryn?
Pwy sy'n dwad dros y bryn yn ddistaw ddistaw bach, a'i farf yn llaes yn wallt yn wyn a rhywbeth yn ei sach? Sion Corn! Nadolig! Fy hoff adeg i o'r flwyddyn.

Pwy sydd isio bod yn fawr?
Wel, dwi'n tybio fod yna lot o bobl sydd isie bod yn fawr. Ond so chi isie bod rhy fawr achos wedyn dych chi ddim yn gallu gwisgo sodle uchel, a ma hwnna'n drueni. Ond se'n i'n tybio taw'r pobl sydd isie bod yn fawr fwya, yn enwedig yn ystod yr haf a phethe, yw plant sydd isie mynd ar reids yn llefydd fel Oakwood a Alton Towers! Neu yn Disney yn America - y plant sy'n mynd lan i'r dyn, a chi'mod y pethe 'na ma rhaid i chi aros wrth eu ochr nhw i checo'ch taldra chi a wedyn dyw nhw ddim cweit yn ddigon tal i fynd ar y reid? -bydden i'n meddwl taw dyna'r bobl sydd wir isie bod yn fwy.

Wyt ti'n cofio?
Fy atgof cynhara, neu'r atgof cyntaf sgen i, yw fy chwaer yn cael ei geni yn ysbyty Treforys yn Abertawe. Odd bola tost 'da fi ar y pryd a o'n i wedi byta Mini Milk hufen iâ, a pan weles i'n chwaer am y tro cynta nes i chwydu dros ei phen hi i gyd!

Pam V?
Ma 'na bethe anffodus wastad yn digwydd i fi. Rhyw wythnos yn ôl gofynodd rhyw ddyn i fi sut i gyrraedd y maes parcio. A felly nes i rhoi cyfarwyddiadau iddo fe ac ar ôl esbonio sut i gyrraedd y maes parcio nes i weud “You look a lot like Gordon Brown” a medde fe, “That's because I am Gordon Brown”.

Fuoch chi erioed yn morio?
Dwi ddim wedi bod yn morio o'r blaen ond fe fues i'n canwio. Ond ma hwnna'n debyg ondyw e? Fues i'n canwio yng Nglan Llyn. Dwi'n casau dwr - unrhywbeth i wneud â dwr. Bues i bron a boddi ac ar ôl hanner diwrnod yng Nglan Llyn odd rhaid i fi fynd sha thre. Fues i ddim 'na 'to nes bo fi'n mynd i'r steddfod yn Bala - dim y tro yma, y tro cyn 'ny sef 1999 pan odd hi'n dwym iawn, ond ma hwnna'n stori wahanol. Felly na, fydda i ddim yn mynd i forio byth eto, na canwio, na nofio os alla i helpu 'ny.
Darllen mwy...

06/11/2009

Be ddysgon ni ar gofod yr wythnos hon

All neb wadu fod Gofod yn addysgiadol. Dyma ambell i beth bach ddysgon ni wythnos yma.

Mae Aled o Cowbois Rhos Botwnnog yn athro yn Ysgol Botwnnog

Ma Meical Owen di cael colonic irrigation yn yr un sedd a Kylie Minogue.

Cychwynodd y Fflash Mob cyntaf yn 2003

Ma Michael (Tacsi Michael) yn briod gyda dau o blant.

Ma Robbie o Gwibdaith yn edrych fe Shaggy o Scooby Do

Ma Alex Jones newydd brynu car newydd, ac yn wych am neud dynwarediad o Ddolffin.

Ma neuadd Gymuned Canton Caerdydd yn troi mewn i venue reslo gyda'r nos.

Enw bos cyntaf radio Huw Stephens oedd Steve Allen.

Ma perchennog siop Tickled Pink yn Pontypridd - Mark Goodman - yn perfformio fel dynes drag gyda'r nos o dan yr enw Tina Sparkle.

Roedd Llinos Lee yn foel tan oedd hi yn bedair a hanner mlwydd oed.
Ma hi'n casau lager, a Kimberley o Girls Aloud.

Ma Ynyr o Brigyn yr un ffunud a Edwin Van Der Saar.

Ma Mei Mac yn well na Tew Shady yn chwarae Scrabble Cymraeg.

Cododd Dan Amor £3 tra'n perfformio ar astro turf Llanrwst o dan y goleuadau llif.

Beth sydd angen ar y byd pop Cymraeg, yn ol Rhys Mwyn, yw mwy o ddamcamiaethau pop.

Phobias rhai o ser cymru:

Ynyr Brigyn - ei wraig
Elin Fflur - liffts
Tudur Owen - pryfed cop
Dyl Mei - gwartheg
Al Lewis - uchder
Mari Grug - Llygod mawr
Geraint Lovgreen - ofn colli dannedd
Nia Parry - fangs
Bethan Gwanas - canu yn gyhoeddus
boi arall Brigyn - blychau ffon
Malcolm Allen - Llygod Mawr
Dewi Prysor - bod yn styc mewn stafell da Anne Robinson
Gary Slymaker - gwaith
Alex Jones - bod allan yng nghanol y mor
Rhys Mwyn - ffwnc Cymraeg
Meical Owen - siarcod
Jonsi - rhywun yn ei gicio yn y bolycs
Darllen mwy...

05/11/2009

Shwmae Shwmae Tudur Owen?

Tudur Owen gymerodd rhan yn ein holiadur 'Shwmae Shwmae' wythnos yma ar Gofod - lle ma pob cwestiwn yn gan Cymraeg. Dyma ei atebion yn llawn.

Shwmae Shwmae?
Shoe-my, my-shoe. Make an effort - I do! Dyna oedd lein un o'r cymeriadau nes i ar “Mawr”. Dwi di cael lot o stic am hwnnw a dweud y gwir. Clive y Dysgwr. Lot o stic gan ddysgwyr yn rhyfadd ddigon. Ma ambell un wedi dod ata i yn traethu mod i yn neud hwyl am eu pennau nhw, ond nes i ddweud wrthyn nhw “I have absolutely no idea what you just said - can you say it in English please”, a ma nhw'n mynd yn wallgo wedyn!

Blerwytirhwng?
Fel arfer rhwng dau feddwl. Dwi yn un o'r pobl mwya amhendant yn y byd.
Dwi'n un ofnadwy am fethu neud penderfyniad - yn enwedig mewn dadl. Os oes yna ddadl wleidyddol neu rhwbath, dwi'n ffeindio fy hun yn gwrando ar un ochr ac yn mynd “o, o ia, ia, cytuno efo hynna” a ma rhywun arall yn dweud rhwbath arall a “o ia, ia dwi’n cytuno efo hynna hefyd”. Dwi'n ffeindio fy hun yn y canol. Dwi'n useless efo petha fel Question Time a unrhyw fath o ddadl.

Pwy sydd isio bod yn fawr?
Pawb. Dyla pawb fod isio bod yn fawr. Dwi'n meddwl ddylsa ni newid ein agwedd, o ran maint dwi'n feddwl wan. Dwi'n meddwl ddylsa pawb fod ac uchelgais i fod yn fawr, a troi ein trwynau ar bobl tenau. Sa'n arbed lot o broblemau i bobl. Os nathoch chi weld “Wall-E”, y byd 'na yn y gofod lle oedd pawb mor massive oddan nhw'm yn gallu symud, so oddan nhw'n gorwadd ar y gwlau 'ma a pobl yn cario tê iddyn nhw a phetha. Dwi'n meddwl ddylsa ni gyd fod yn dyheu am y math yna o fyd.

Fuoch chi erioed yn morio?
Dach chi wir ddim isio i fi ddechra siarad am hyn achos dwi'n un o'r pobl 'ma sy'n mwynhau be da ni yn alw yn “boat porn”. S'na ddim byd gwell genna i na injan outboard yn purrio fel cath. Felly yndw, dwi yn tueddu i fynd i forio a dwi'n ymddiddori mewn cychod. A dach chi rili ddim isio clywad fi'n siarad am gychod neu 'swn i yma drw'r dydd.

Pwy yn y byd wyt ti?
I fod yn hollol onast dwi ddim rhy saff erbyn wan pwy ydw i achos mae o'n rwbath sy'n mynd efo'r math o waith dwi'n neud. Pan dwi ar lwyfan yn neud stand-up fel fi fy hun, nid fi fy hun ydy o go iawn. Pan dwi'n neud o yn Gymraeg dwi'n y person yma ar y llwyfan, ond pan dwi'n neud o yn Lloegr ac yn Saesnag dwi'n ffeindio mod i'n math gwahanol o berson. Ie, dwi'm rhy saff pwy ydw i a dweud y gwir.


A yw fy enw i lawr?
Ydy, dwi'n gobeithio bod yn enw fi lawr. Yn aml neu pheidio ma'n enw fi i lawr yn anghywir. Yn enwedig pan dwi'n mynd i neud gigs yn Lloegr ma'n enw fi lawr ar y bil - yn y gwaelod fel arfer, mewn print bach iawn - fel arfer yn Tudor Owen, sydd yn weindio fi fyny. Ma'r MC yn fy nghyflwyno i fel Tudor Owen. Dwi'n trio cael o i ddeud Tudur Owen a'r ffordd ora dwi di cael nhw i gofio wan ydy dwi'n deud wrthyn nhw pan dach chi'n cyflwyno fi cofia “Ta-daaah” ond dipyn bach mwy efo “uuu” a “rrrr” a ma nhw'n mynd “Here is Tuduuuuuurrr” a ma hynny i weld yn gweithio. Ond ma na ambell un jyst wedi anghofio a dwi'n gweld nhw o gefn llwyfan pan ma nhw'n mynd ymlaen, “And the next act, all the way from Wales… Give him a cheer!” a wedyn dwi'n cerddad on achos dy'n nhw ddim yn cofio enw fi.

Fysat ti?
Bach o lubrication ella. Dria'i fo unwaith!

Pwy sy'n galw?
Dyna gwestiwn fydda i'n gofyn yn aml pan dwi'n clywed y ffôn. Dwi byth yn ateb ffôn os ydy o'n deud 'caller withheld their number'. Dwi'n eitha od am hynny. Dwi'm yn trystio pobl dienw felly. Dwi'n rhywun sy'n mwynhau technoleg a chware efo toys a petha felna ond mae o'n wbath dwi ddim yn licio am yr holl dechnoleg newydd ydy fod o'n creu byd anhysbys neu mae o'n medru rhoi y modd i bobl fod yn ddienw. Yr internet a ffôns a'r hyn a'r llall. A ma hynny yn mynd dipyn bach yn groes i'r graen i mi - dwi'n licio cael gweld pwy dwi'n siarad efo. Dwi'n licio cael delio efo bobl wynab yn wynab. Ma genna i reol pan dwi'n neud stand-up neu comedi o unrhyw fath - os nad mod i'n fodlon neud o i wynab rhywun, i'r gynulleidfa yna, wedyn ddylswn i ddim ei ddeud o. A dwi'n meddwl ddylsa pawb sticio at y rheol yna. Sa'n brafiach o lawar. Achos fysa na lot llai o gachwrs wedyn, ar y internet, yn ista wrth ymyl eu sgrins drwy'r nos yn wancio ac yn speitio bobol. Dach chi'n gwbod pwy ydach chi - y wancars.

Pam V
Pam V? Pam V? Dwi'n medru bod yn boring iawn. Ma'r rhan fwyaf o ddigrifwyr yn bobl boring iawn iawn iawn! A “V” ydy pump mewn rhifau Lladin. Dach chi'n gwbod pam? Achos oedd y bugeiliaid yn hen Rhufain ac yn yr hen Eidal a petha, oddan nhw'n naddu, yn cyfri defaid ac yn naddu - un fesul un - un ddafad, dwy, tair, pedair, a pan oddan nhw'n cyrraedd pump oddan nhw'n neud dwy farc ar y pren, a wedyn pan oeddan nhw'n cyrraedd yr ail bump oddan nhw'n rhoi dau farc ar draws - felly “X” ydy 10. Diddorol ynte? Deffrwch.
Ond odd genna'i ffrind odd ddim yn dda iawn efo rhifau lladin ac odd o'n taeru fod ei daid o wedi bod yn ymladd yn World War Eleven!

Pwy fedar molchi?
Fi. Dwi'n medru molchi, dwi'n falch o ddeud. Ond dwi hefyd o'r genhedlaeth yna sydd yn cofio - ella fod pobl yn neud o heddiw efo plant - ond pan o'n ni'n blant de, a dwi'n gobeithio na dim jyst teulu fi oedd, ond oddan ni mond yn cael wash unwaith yr wythnos - ar nos Sul fel arfer! Felly erbyn dydd Gwener ma'n siwr bo ni'n hymio drewi! Sydd yn od achos ma mhlant i heddiw yn golchi bob dydd - ond doddan ni ddim. Ma hynna'n disgusting. Sdim rhyfadd o'n i ddim yn cael cariadon. Nesh i ddechra golchi pan o'n i tua un ar hugain - bob dydd llu!


Darllen mwy...

04/11/2009

Talwrn y Beirf






Ma dynion barfog ym mhobman. Ma Gofod wedi bod yn gweithio ar rhestr o'r beirf orau yng Nghymru, i fynd ar y rhaglen. Dyma rhagflas bach. Croeso i chi awgrymu beirf Cymraeg enwog eraill i fynd i'n deg uchaf. Yn y cyfamser, allwch chi enwi rhain?
Darllen mwy...

03/11/2009

Sioe neithiwr

Naethoch chi joio? Nodyn bach i son am y reslo. Ma Eddie Lizard wedi hedfan allan i Ganada lle ma fe bellach yn byw, ond os oes diddordeb gyda chi fynd i weld rhai o'i ffrindiau yn tagu, crogi, slamio a thaflu eu gilydd o amgylch canfasau mewn amryw leoliadau yn ne Cymru, mae yna wybodaeth am eu holl ddigwyddiadau ar http://www.celtic-wrestling.co.uk/. Darllen mwy...

02/11/2009

Heno ar Gofod

Ydych chi erioed wedi meddwl y bydde fe'n hwyl cael clywed meddyliau pobol? Wel yma ar Gofod mae gyda ni bwerau arbennig a'r gallu i gyfathrebu gan ddefnyddio 'telepathy'. A heno, am y tro cyntaf, camwn y ty fewn i feddwl unigolyn. Geraint Lovgreen, i fod yn fanwlgywir. Tiwniwch i fewn am ddeg o'r gloch i glywed y canlyniad.

Hefyd ar y rhaglen ma Cowbois Rhos Botwnnog yn perfformio yn ysgol Botwnnog, Meical Owen yn dal tacsi Michael, Alex Jones yn ateb ein holiadur Shwmae Shwmae a plac glas yn cael ei osod i ddathlu'r lle cyntaf i Huw Stephens gael chwarae recordiau yn gyhoeddus. I gleifion.
Hyn oll, a rhywbeth arbennig iawn i ffans reslo!
Darllen mwy...

30/10/2009

Beth ddysgon ni neithiwr?

Wel ddysgon ni am rhai o hoff eiriau'r ser, i ddechre. Oeddech chi yn ymwybodol mae pendramwnagl oedd hoff air Daf Du? Neu fod Huw Chiswell wrth ei fodd a'r geiriau hiraeth ac annibyniaeth? Hoff air Malcolm Allen yw llesmeiriol, Bethan Gwanas yn hoff o'r gair ci, Alex Jones yn lletwyth a Brygyn yn mwynhai ffrwchnedd. Gore oll, hoff air Cymraeg Jonsi yw... 'bolycs'! Ti'n shwr fod hwna'n air Cymraeg, Jonsi?



Felly cwestiwn y dydd yw... be yw eich hoff air Cymraeg chi? Darllen mwy...

Gwahanwyd yn y groth #2

Dyl Mei a Tom Chaplin o Keane








Darllen mwy...

O bryd i'w gilydd, fydd Gofod yn rhoi her i grwpiau o fyfyrwyr, ffermwyr ifanc, neu unrhywun arall sy'n gem. Yn y cyntaf o rhain, naethon ni fynd a grwp o ffermwyr ifanc i Lundain i rhedeg y Great Gorilla Run. Ma na fwy o wybodaeth am y ras, ac am godi arian i achub y gorillas, ar http://www.greatgorillas.org/.


Os bydde diddordeb gyda chi a grwp o ffrindiau mewn cymryd rhan mewn rhyw fath o her, nes os ydych chi yn clywed am ddigwyddiad sy'n edrych fel sbort, cysylltwch trwy adael neges.
Darllen mwy...


Cofiwch fod Gofod yn cael ei ail ddarlledu pob nos Wener ar S4C. Bydd rhaglen un yn mynd allan heno am 2310, a'r ail rhaglen yn syth ar ol hwna, am 2340. Felly nawr mae cyfle gyda chi i ail wylio performiad Gwibdaith yn JMJ, a chyfweliad Daf Du (byse chi'n gadael iddo fe deithio gyda'r llun passport yma?) yn y stiwdio.
Darllen mwy...

29/10/2009

Bandiau ar Gofod heno


Elin Fflur a Ginge a Celloboi fydd yn cynnig adloniant cerddorol ar Gofod heno. Fydd angen dim cyflwyniad ar Elin, un o wynebau a lleisiau enwoca'r sin Gymraeg, ond efallai y bydd Ginge a Celloboi yn neydd i chi. Deuawd o Gaerdydd ydy nhw, sy'n canu cerddoriaeth bluegrass, jazz ac Americana. Allwch chi ddyfalu p'un di p'un?

Darllen mwy...

Shwmae Shwmae


Ma gem bach gyda ni ar Gofod, gem i ni yn galw Shwmae Shwmae. Y syniad yw ein bod ni'n holi rhai o ser y byd Cymraeg gan ofyn cwestiynau sy'n enwau caneuon. Fel Shwmae Shwmae? Neu... Pwy Sy'n Dwad Dros y Bryn? Neu Blerwytirhwng? Y cyntaf i gymryd ein cwis yw Tudur Owen ar Gofod heno.
Darllen mwy...

27/10/2009

Gwahanwyd yn y groth



Rydym yn awyddus i glywed eich awgrymiadau am lookalikes y byd Cymreig. Dyma un bach amlwg i ddechre pethe.

Howard Marks a Gethin Evans
Darllen mwy...

26/10/2009

Enwau Anwes

I chi yn dysgu rhywbeth newydd pob dydd ar Gofod. Mae Cymru nawr yn gwybod fod Rhys Ifans yn galw ei biji bo yn Gareth. Oes enwau anwes gyda chi am bethe heb law am anifeiliaid? Os enw gyda'ch car, falle? Neu, fel Rhys, ar rhan o'ch corff? Darllen mwy...

Plac Glas i Duffy


Cyn Warwick Avenue, cyn yr arian, yr enwogrwydd, cyn Wow Ffactor, hyd yn oed, roedd gan Dyffy swydd. Pwy a wyr beth oedd yn mynd trwy ei meddwl tra'n gweithio yn siop Politos? Falle i hi feddwl am alawon, neu geiriau. Falle iddi ganu bob bore ar ei ffordd i fewn, ac eto ar ei ffordd gatre. Yr hyn sy'n bwysig yw fod Gofod wedi gosod Plac Glas ar y siop yma, fel gwelwch chi yn y llun, er mwyn i'r Cymry cael gwybod fod un o'n trysorau cenedlaethol wedi bod ar staff y siop ddillad fach yma yng Ngogledd Cymru.

Oes na lefydd eraill, tybed, y dyle ni fod yn dathlu yn y ffordd yma? Bu Elvis yn gweithio yn eich siop jips leol? Naeth Dafydd Iwan sgwennu Yma o Hyd yn eich stafell ffrynt? Rhowch wybod! Mi fyddwn ni yn gosod placiau glas mewn lleoliadau o bwys i'r genedl yn wythnosol ar Gofod, felly postiwch eich awgrymiadau isod... Darllen mwy...

23/10/2009

Bang Bangor!



Ma ishe dechre’r pethe ‘ma gyda Bang ond oes? A phwy fang sa’n well dechre cyfres newydd gyda na Bang Bangor, gwyl newydd sbon sy’n gaddo llenwi pob twll a chornel o Fangor gyda chelf a cherddoriaeth. Naethon ni glywed gen nifer o fonheddigion a bonheddigesau Bangor am y llefydd orau i fynd a bandiau i’w clywed dros y penaythnos ar rhaglen gyntaf Gofod, felly does na ddim esgusodion nawr i golli unrhywbeth. Mae’r lineups a gwybodaeth am tocynnau ag ati i gyd ar wefan Bang Bangor - http://www.bangbangor.com/.


Ma na gymaint i ddweud am y gyfres newydd yma. Gobeithio y dewch chi i nabod rhai o’r cymeriadau a’r syniadau ty ol i’r rhaglen dros yr wythnosau nesa, felly dwi ddim am ddweud pob dim nawr a sbwylio’r syrpreis ond mae’n rhaid son yn fras am Tacsi Michael. Mae’n rhaid eich bod chi di caels sgwrs gyda gyrrwr tacsi siaradus rhywdro neu gilydd. Wel dyna Michael, i’r dim. Gyrrwr tacsi o Fethesda sy’n hoff o glonc yw Michael, ac mi fydd yn rhoi lifft i nifer o enwogion Cymru dros yr wythnosau nesa. A’r person cyntaf i neidio i fewn i’r car – a sgwrsio yn fwy agored nag i chi erioed wedi clywed o’r blaen? Y gwr yma!
Darllen mwy...

22/10/2009

Croeso i Gofod!

Helo a chroeso i blog Gofod. Yma, cewch wybodaeth am y rhaglen, gossip a phob math o wirioni arall.

Cyn mynd dim pellach, be am i ni gyflwyno ein cyflwynwyr, Gethin Evans ac Elen Gwynne.
Geth oedd y boi golygus yn Kentucky AFC, wedyn y boi Golygus yn Genod Droog, a wedyn y boi golygus yn Yucatan – a rheina yn dri o fandiau ,wyaf golygus y sin Gymraeg, mae’n shwr wnewch chi gytuno! Mae Geth wrth ei fodd yn cyflwyno Gofod, ond roedd yn nerfus am rhai o ofynion y byd teledu. I ddechrau, bu rhaid iddo gael torri ei wallt mewn siop barbwr go iawn am y tro cyntaf erioed. Doedd neb ond ei fam wedi cyffwrdd a’r cyrls cyn y diwrnod emosiynol yna. Mae ganddo ddillad newydd sbon ar gyfer Gofod, ac mae na si ar led fod y cynhyrchwyr hyd yn oed wedi ei berswadio i gymryd bath.

Mae Elen Gwynne yn tipyn o stad. Sori. Ma Elen Gwynne yn Tipyn o Stad. Ie, na le i chi di i gweld hi o’r blaen, Susan di Elen! Dros yr wythnosau nesa mi fydd Elen yn mynd i arddangosfa bop yn amgueddfa Sain Ffagan, cwrdd a reslar o Gaerdydd, yn ymweld a’r siop drin gwallt lle oedd Matthew Rhys yn mynd i gael ei short back and sides pan odd e’n grwt, a’n holi ser y byd Cymraeg gyda Geth ar y soffa yn stiwdio Gofod. Darllen mwy...